Mashhur.uz

Uning birgina «yeb qo’yguday» nigoh tashlashi butun badaningni muzlatib yuboradi. Go’yoki ajal ro’parangda turgandek, o’zingni ojiz sezasan. Ismi ham dahshatli – Memati («o’lim» ma’nosini bildiradi). Lekin uning bu qadar nafratli qarashlariga e’tibor qilmang. Memati ham siz va biz kabi oddiy odam. Faqat u o’ziga berilgan rolni maromiga yetkazib ijro etgan. Bu so’zlarimga «Qashqirlar makoni»ning Mematisi – Gurkan Uyg’un bilan uyushtirgan suhbatimiz davomida amin bo’lasiz.

DEBYUT: SINFDA QOLISH

— Avvalo o’quvchilarni kino san’atiga kirib kelishingiz qiziqtiradi?

— Litseyda o’qiyotgan paytimda, bilim yurtimizda «Bir Amerikali» asari sahnalashtirilayotgandi. Ushbu asar litsey rahbariyati va o’quvchilarga taqdim etiladigan kun rol ijro etayotgan sinfdoshim qandaydir sabab bilan kelmay qolgandi. Shunda rejissyor «Endi uning o’rnini kim egallaydi?», deb bizga muztar qarab qoldi. Men esa hech ikkilanib o’tirmay, qo’limni ko’targanman. Sifdoshimning rolini hech qanday tayyorgarliksiz ijro etgandim. Bilasizmi, shundan keyin litseydagi teatrga shu qadar bog’lanib ketibmanki, bu yoqda o’qishim ham qolib ketibdi. O’sha yili sinfdan-sinfga ko’cha olmaganman.

— Memati roli shaxsiy hayotingizda nimalarni o’zgartirdi?

— Qaysi tomondan boqishimizga bog’liq. Siz nazarda tutayotgan pul masalasi, ya’ni «Shu ijrodan keyin juda boy bo’lib ketgandirsiz?», deb so’rashga andisha qilib turganingizning o’zi men uchun bir baxt. Negaki, tomoshabinni «Qashqirlar makoni»dan ishlab topgan boyligim emas, Mematining xarakteri, «og’a»siga sodiqligi qiziqtirishiga ishondim. U meni bir zumda elga mashhur qilib yubordi. O’zim kutmagan mashhurlikka erishdim.

«MEMATI HAM MENING SEVIMLI QAHRAMONIM»

— Darvoqe, Mematining nigohi to’la nafrat. Bunday «qotilona qarash»ni qayerdan o’rgandingiz?

— Rejissyorimiz «Memati shunday obrazki, dushmanlari uni ko’rganida o’lim sharpasini sezishsin», degandi. Shundan keyin men qamoqxonalarga bordim. O’ta xavfli maxbuslarni kuzatdim. Lekin birortasida ham men istagan «nigoh»ni ko’rmadim. Bir kuni National Geography ko’rsatuvi yirtqich qushlar haqida lavha berdi. Shunda burgut, lochinlarning ov qilish jarayonidagi ko’zi qanday ko’rinish olishiga e’tibor qaratdim. Mematining «qotil nigoh»i aynan yirtqich qushlardan olingan.

— Ajoyib! Memati ko’rinishidan dahshatli bo’lsa-da, nega uni hamma yaxshi ko’radi?

— Oddiy haqiqat: barcha inson adolatli, sodiq, shu bilan birga bir so’zli bo’lishni xohlaydi. Biroq o’zlariga qoida qilib olgan aqidani har doim ham uddasidan chiqa olishmaydi. Memati so’zida tura oladigan, boshiga o’lim soya solib turganda ham og’asiga sodiq qolgan haqiqiy yigit kishi. Shundanmi, u barchaning sevimlisi.

— Ko’rinishingiz Mematiga o’xshab ketibdi. Hayotda ham u kabimisiz?

— Mematini o’ynaganimdan keyin men o’xshamay, kim o’xshasin?! Lekin hayotda u kabi qattiqqo’l, qo’pol muomalali emasman. Birovning ko’ngliga ozor berish qo’limdan kelmaydi. Agarda shunday holat yuz bersa, ikki-uch kun vijdon azobida qiynalaman. Ekranda shu kungacha Memati 300dan ortiq qotillikni amalga oshirdi. Hayotda, biror kishini o’ldirish qo’limdan kelmaydi. Meni hursand etgani, serialda Mematining «o’ldirgan»lari bir zum o’tmay, yana oyoqqa turib ketishidir. To’g’ri, Memati ham mening sevimli qahramonim. Lekin u «yo’q»dan «bor» qilingan.

QALBI «YOPIQ» EMASMAN

— Mematining «Erkak kishi sog’inmaydi, sog’intiradi!», degan gapi yigitlar orasida shiorga aylanib ketgan. O’zingiz ham shunga amal qilasizmi?

— Qalbi «yopiq»lar toifasiga kirmayman. Ammo tuyg’ularimni oshkor etishda iymanaman. Buni ayolimdan boshqasi anglay olmaydi. U bir qarashimdayoq, mehrimni ham, nima demoqchi ekanligimni ham sezadi.

— Endi sizga komedik rollar yarashmasa kerak-a?

— Nega endi? Yaqinda teatrda bir asar sahnalashtirdik. Unda men komik qahramonni ijro etdim. Hamkasblarim «Zo’r o’ynading», deyishganidan bildimki, demak, bir joyda qotib qolmabman.

— Eshitishimcha, sizda nodir klassik musiqalar va haykallardan iborat kolleksiya bor ekan?

— Sizga to’liq va aniq ma’lumot berishmabdi. Birinchisi, to’g’ri. Nodir klassik musiqalardan iborat 600dan ortiq kolleksiyam bor. Ikkinchisi esa noto’g’ri. Men haykallarni yig’mayman. Ularni o’zim yasayman. Haykaltaroshlikka da’voim yo’q. Bu - mening xobbim. Bo’sh vaqtlarimda, tasavvurimdagi g’oyalarni toshlarda namoyon etgim keladi.

«OSHIQ BOLA»DAN MASHHURLIKKA

“Gurkan Uyg’un birdaniga mashhur bo’lib ketmagandir”, degan shubhaga borgan turkiyalik hamkasblarimiz uning tarixini bir-bir «titkilashib» chiqishdi. Va qiziq ma’lumotga duch kelishdi. «Qashqirlar makoni»ning Mematisi Turk estrada yulduzi Yulduz Tilbening 1995 yilda chiqargan «Tillarda doston» albomidagi «Voz kechdim» qo’shig’iga ishlangan klipda suratga tushganini aniqlashdi. Ushbu klipda Gurkan Uyg’un oshiq yigit rolini ijro etgan. U o’sha paytda 21 yoshda edi. Yulduz Tilbe xonishida qizning sevgilisi bo’lib ko’ringan yigit shu klipdan keyin rejissyorlar nazariga tushdi. 1996 yilda «Totli qo’shiqlar», keyin «Shunday bo’ladimi?», «Yettinchi raqam», «Telba yurak» kabi filmlarda suratga tushdi.

KUYOVJO’RA – NЕJATI SHASHMAZ

Gurkan Uyg’un mashhurlikda o’zidan qolishmaydigan, televideniyeda «Bizni kimdir nishonga olyapti» (Biri bizi gozaltiyor – BBG) ko’rsatuvi boshlovchisi Shabnam Jaylon bilan oila qurgan. Ikki yulduzning bir kun oldinga surilgan nikoh oqshomidan hattoki, tezkor jurnalistlar ham bexabar qolishgan ekan. – Biz visol bazmimizni ommaga oshkor qilishni xohlamadik. Shu bois ham shanbaga belgilangan kechani juma kuni o’tkazdik, deydi Shabnam xonim. - To’yimizni ko’rgani kelgan odam «Bu yerda «Qashqirlar makoni»ning navbatdagi qismlari suratga olinyapti», deb o’ylashi tayin edi. Ziyofatga taklif etilgan 300 nafar mehmonning 90 foizi shu serial qahramonlari edi.

Gazetalarning yozishicha, «Memati»ning kuyovjo’rasi Po’lat Alemdar ijrochisi Nejati Shashmaz bo’lgan ekan.

Hozirda Gurkan Uyg’unning ikki nafar farzandi bor.

Dilmurod PARPIYЕV mashhur.uz uchun maxsus tayyorladi